താമരശ്ശേരി:പ്രശസ്ത റേഡിയോ നാടകകൃത്തും സാഹിത്യകാരനും ആയിരുന്ന ഹുസൈൻ കാരാടിയെ അനുസ്മരിപ്പിക്കുന്ന ചടങ്ങ് താമരശ്ശേരി പബ്ലിക് ലൈബ്രറിയുടെ നേതൃത്വത്തിൽ സംഘടിപ്പിച്ചു. രാജീവ് ഗാന്ധി ഓഡിറ്റോറിയത്തിൽ നടന്ന അനുസ്മരണ പരിപാടി കവി പി.പി. ശ്രീധരനുണ്ണി ഉദ്ഘാടനം ചെയ്തു.
"വായനക്കാരുടെയും എഴുത്തുകാരുടെയും ഉള്ളിലാഴത്തിൽ തങ്ങിനിൽക്കുന്ന ഹൃദയസ്പർശിയായ രചനാശൈലിയാണ് ഹുസൈൻ കാരാടിയുടേത്. അനാവൃതവും സൗമ്യവുമായ ഭാഷയും ജീവിതാനുഭവങ്ങളാൽ നിറഞ്ഞ കഥാപാത്രങ്ങളും അദ്ദേഹത്തെ വേറിട്ടവനാക്കി," ശ്രീധരനുണ്ണി പറഞ്ഞു.
ആകാശവാണി മഞ്ചേരി നിലയം പ്രോഗ്രാം മേധാവി സി. കൃഷ്ണകുമാറും, ആകാശവാണി കോഴിക്കോട് മുൻ പ്രോഗ്രാം എക്‌സിക്യുട്ടീവ് പുഷ്പ തിക്കോടിയനും അനുസ്മരണ പ്രഭാഷണങ്ങൾ നടത്തി.
ചടങ്ങിൽ ലൈബ്രറി പ്രസിഡന്റ് ജോസഫ് മാത്യു അധ്യക്ഷനായിരുന്നു. ഹുസൈൻ കാരാടിയുടെ ഫോട്ടോ ആമിന ഹുസൈൻ അനാച്ഛാദനം ചെയ്തു. സ്മാരക വായനാമുറിയുടെ ഉദ്ഘാടനം കൊടുവള്ളി ബ്ലോക്ക് പഞ്ചായത്ത് പ്രസിഡന്റ് കെ.എം. അഷ്‌റഫ് നിർവഹിച്ചു.
പ്രത്യേക അവസരത്തിൽ വിവിധ മേഖലകളിൽ മികവ് തെളിയിച്ചവരെ താമരശ്ശേരി ഗ്രാമപഞ്ചായത്ത് പ്രസിഡന്റ് എ. അരവിന്ദൻ ഉപഹാരങ്ങൾ നൽകി അനുമോദിച്ചു.
പി.കെ. രാധാകൃഷ്ണൻ, കെ.കെ. പ്രദീപൻ, മജീദ് മൂത്തേടത്ത്, കെ. വേണു, മജീദ് ഭവനം, എം. സുരേഷ് ബാബു, എ.കെ. ദേവി, എ.ആർ. സുരേന്ദ്രൻ തുടങ്ങിയവർ ആശംസകൾ അറിയിച്ചു.